HAIR, SKIN & NAILS Review - تجربة فيتامينات الشعر ، البشرة و الأظافر

بسم الله الرحمن الرحيم ، 

Hair , Skin And Nails من شركة Nature's Bounty
من أشهر الفيتامينات في السوق دحين .. 
والكل يبغى يعرف إزا مفيدة و لالا ؟ 
آكتر الاسئلة الي انسألها 
> دينا صح تفرق ولالا ؟
من فين ؟ كم سعرها ؟ و الجيلاتين خايفين يكون من الخنزير و اسئلة غيرها .. 

للتنبيه دا النوع ^ 

كل كلامي عن الفيتامينات الي في الصورة لأنو في كذا نوع ! 

من فين ؟ 

من موقع آيهيرب قبل كدا طلبت منه  : لو حابة تشوفي الموضوع  هنا .
و رابط نفس الفيتامينات في الموقع هنا

سعرها ؟ 

هنا اعتبرها الصدمة لانو العلبة الوحدة بالتقريب ب ٦٤ 

مفيدة ولالا ؟ 

انا كنت استخدمها كل يوم ب مقدار ٣ حبات زي ما هوا مكتوب بعد كل وجبة . حبة لكل وجبة
و اشرب مويا كويس .. 
* ما تستمري عليها و تقولي مو كويسة دا شي طبيعي - او تستمري كل يوم بس مو ب نفس الجرعة المطلوبة محا تشوفي تحسن ملحوظ .. 
تنسيها يوم عادي مو تقولي اعوض لا ، لانك كدا حتكوني اخدتي جرعة زيادة عن حاجتك .. 
و الفيتامينات زي ما هيا مفيدة كثرتها تضر .. *

تقدري تكبري الصورة و تعرفي تحتوي على ايش بالزبط .. 
انا دا ثاني استخدام ليا .. 
في رمضان بدات آول كورس علبتين كلهم كانو 5000mcg of Biotin الي لون الحبوب احمر تقريبا .. 
يخلصو في ٣ شهور و نص تقريبا .. 

في بداية اول اسبوع من رمضان اول ما بدات استخدمها تقريبا كنت حوقفها .. 
طلعت كم حبة في وجهي و كان غريب بالنسبة ليا الموضوع و قلت حوقفها و انو مو كويسة .. 
بس افتكرت انو قرأت كم وحدة تقول انو البداية تطلع حبوب بس ناسية والله السبب .. 
تقريبا عدت ٥ ايام و الحبوب حقيقي اختفت .. و انبسطت .. 
التغيير السريع حتشوفيه في الاظافر من اسبوعين تقريبا .. 
انا كان همي الوحيد آظافري الصراحة .. لانو احط مناكير كتير و مع الاسيتون مرة تضعف و عندي مشكلة ما تطول الا بعد طلوع الروح ، و بحكم انها مرة خفيفة كانت ما كنت احب اطولها .. غير انو تتكسر بسرعة و من اي شي .. 
سارت اقوى الحمدلله و غير انها تطول اسرع من اول بمراحل .. 
بعد تقريبا شهر و نص بشرتي اتحسنت ما تطلع حبوب الا نادر جدا جدا جدا .. 
و الشعر تقريبا على اخر شهر حسيت ب الفرق ، طلع بيبي هير مرة واضح خصوصا من قدام .. 
( إلي اكلهم صحي احس حتبان النتايج افضل و احسن معاهم ) 

نجي للموضوع الي شاغل هم الكل ، و نصايح و فتاوي : 
هل الجيلاتين خنزير او بقري ؟ 
جدا اشكر صحبة الحساب دا موضحة كل شي : 
اضغطي على الصورة للتكبير و التوضيح 

بكل اختصار الي عندها الحبوب و تبغى تتآكد جيلاتين خنزير و لا بقري :
تشوف الرقم على المنتج مكتوب جمبه Prod. No. 35710 دا بقري و غيرو لا .. 



بتمنى اكون افدتكم .. 

ما كان فيه من صواب فمن الله وحده وما كان فيه من خطأ فمني ومن الشيطان.

HOWTO#2 Apply Manicure As Pro !

دا البوست حيكون تاني واحد من مجموعة ( كيف ) ؟ 

حيكون عن .. كيف ممكن نحط طلاء الأظافر\المناكير بطريقة محترفة ! 

الخطوات سهلة ، و أحس من الضروري يكون المناكير مرتب و مو خارج عن الأظافر عشان السبب الاول للمناكير التزيين مو التشويه .. 

١- آول شي و آهم شي لازم نتخلص من اي مناكير سابق و نتاكد انو الاظافير نظيفة ، باستخدام اي مزيل مناكير يناسبك و عن نفسي افضل حق ( سيفورا ) سهل و سريع .

٢- ضروري جدا تكون الاظافير مقصوصة و مرتبة مو بمعنى تكون قصيرة لا .. 

يعني كل الاظافير تكون تقريبا نفس الطول مو واحد طويل و الي جمبو قصير و لا كل ظفر شكلو غير عن التاني الي داىري و الي مربع .. 

الافضل يكون طولهم متساوي لبعض و شكلهم يناسب يدك .. 

٣- نعمل سكرب ناعم لليد و نرطبها ، الافضل حولين الاظافر المنطقة تكون مرطبة حتحلي المناكير اكتر . 

و تقدري تستخدمي اي مرطب انتي حابتو ! 

عن نفسي افضل حق باث اند بودي هوا مخصص للعناية باليد . 

٤- استخدام منظف للاظافر ، يعمل على ازالة المواد المترسبة على الظفر الي ما تنشاف و يهيء الظفر لوضع طبقة الحماية ، صراحة ماقيد شفت المنتج عند ولا شركة عناية بالاظافر غير ( سيفورا ) ** ممكن الاستغناء عن دي الخطوة .

٥-  ضروووري جدا لحماية اظافرك من التشقق استخدام طبقة حماية قبل المناكير ( البيس كوت ) 

تقريبا كل شركات المناكير المعروفة عندهم منتجات عناية بالاظافر ، طبقة البيس كوت تحمي الاظافر من المناكير و كمان تعمل طبقة بين الظفر و لون المناكير بحيث انك لو مسحتي المناكير ما تبقى اثار للون علئ الاظافر . 

حابة جدا المجموعة الي من ( سيفورا ) . 

٦ - الخطوة الاهم هي عند اختيارك للون المناكير تراعي انو يناسب لون بشرتك ضروري ضروري جدا ، مو كل مناكير يعجبنا يزبط علينا ، كتير الوان جربتها و من جد لاحظت السمار على طول عكس الوان تفتحلك بشرتك . 

فرشة المناكير ما نخليها ناشفة من المناكير و مانخليها ممتلئة منو ، نبدآ نوزع المناكير من وسط الاظفر من تحت ل فوق و نبدا نمد من الوسط لليمين ثم اليسار .

الصورة حتوضح الطريقة آن شاء الله 

٧- نبدآ ننظف الزوايا اذا طلع المناكير خارج حدود الظفر باستخدام مزيل مناكير و فرشة رفيعة جدا . 

٨- نستنئ المناكير شوية ينشف عشان نحط اخر طبقة و الي هيا الطبقة الي حتعطينا اللمعة و انو المناكير يدوم وقت اكتر بدون ما يتقشر ( التوب كوت ) .

* مو شرط كلهم يدوكي اللمعة ممكن بعضهم يكونو مات فيقلب اللون مطفي ، حسب انتي ايش تحبي و تفضلي .

صراحة منتج ايسينس قد ما هو جميل جدا و يديكي لمعة اتعب اقول جميلة الا انو ياخد وقت طويل عشان ينشف .. 

ف بالعادة استخدم قطرة تسرع انو المناكير ينشف برضو من ايسينس .. 

ممكن الخطوات تكون كثيرة ، بس ما تاخد وقت ابدا .. 

و تساعدك على المحافظة على اظافيرك .. 

Instagram : Dina_LifeStyle